Handverksmessa i Jondal har blitt arrangert annakvart år sidan 1986. Kvar messa samlar over 100 utstillarar frå heile Noreg. Handverksmessa ynskjer å vera ei motvekt til den kommersielle messeverda og legg vekt på kvalitet, tradisjon, mangfald og kunnskap.

Utstillarane set opp eigne telt/bodar på messeområdet i og ved Jondal skule. Strikking, treskjering, gravering, broderi, smykkelaging, glasblåsing, veving, keramikk, klesdesign og bunader er berre nokre av handverkstradisjonane du kan få kjennskap til under messedagane.

Kvar messe har sitt eige særtema. Særtema for Handverksmessa 2012 vert “Trebåt”. Eiga temautstilling vert å finna i Vikeløa. Trebåtbyggjarmuseet i Herand vil òg  vera ope under messedagane, med båtbyggjar Sverre Haugen som guide.

Handverksmessa vert arrangert på dugnad av 12 friviljuge organisasjonar i kommunen. Overskotet frå Handverksmessa vert delt ut til dei laga som deltek med friviljuge under messedagane. Såleis held messa også liv i organisasjonslivet i kommunen.

Jondal er ein liten kommune ved Hardangerfjorden i Hordaland. Kommunen er truleg mest kjend for Folgefonn sommarskisenter og artisten Herborg Kråkevik, men kan også skilta med landsbystatus og for å ha arrangert ein av dei fyrste festivalane for ungdom i regionen. Jondal byr også på rike naturopplevingar både langs fjorden og til fjells.

Handverksmessa i 2012 vert arrangert 22.-24.  juni.